أدلت البلوجر أم سجدة، البالغة من العمر 29 عامًا باعترافاتها والمتهمة بالتحريض على الفسق والفجور والإساءة للمرأة المصرية، وغسيل الأموال في القضية التي حملت رقم 1767 لسنة 2025، حيث زعمت أن الفيديوهات مضحكة أو إعلانية، ولا تقدم محتوى خادش للحياء، مؤكدة أنها لا تكسب أموالًا من الفيديوهات سواء على تيك توك أو فيسبوك.
وأمام جهات التحقيق قالت أم سجدة المتهمة بالتحريض على الفسق والفجور والإساءة للمرأة المصرية، وغسيل الأموال: “أنا مولودة ومتربية في السيدة زينب في دوران زينهم، وأبويا شغال سواق في المقاولون العرب ومامتي عاملة في مستشفى القصر الفرنساوي، وليا أخواتي أحمد وكريمة بس.
وأضافت أم سجدة في التحقيقات: أنا مطلقة رسمي من حوالي شهرين ومعايا بنتي سجدة عندها 9 سنين وابني محمد عنده 7 سنين، ودلوقتي قاعدة معاهم في شقة إيجار في الهضبة الوسطى بالمقطم بقالنا فيها شهر ونص تقريبًا.
وأوضحت أم سجدة في اعترافاتها أمام جهات التحقيق: “أنا خرجت من التعليم من تانية إعدادي، وبشتغل دلوقتي في عمل فيديوهات على النت لتسويق المنتجات، وبقالى حوالي سنة في الشغل ده، واللي حصل يوم القبض عليا إني كنت قاعدة في البيت لقيت الحكومة بتخبط، ولما فتحت لقيت ناس كتير دخلوا وفتشوا البيت وسألوني عن موبايلي، ادتهولهم وخدوني على القسم، وهناك جم ناس من تكنولوجيا المعلومات فحصوا الموبايل وسألوني عن الفيديوهات، وأنا قلتلهم دي فيديوهات للتسويق وهزار مش أكتر.”
وتابعت أم سجدة في اعترافاتها في قضية التحريض على الفسق والفجور والإساءة للمرأة المصرية، وغسيل الأموال: “اتقبض عليا كان يوم 31 يوليو الساعة 11 بالليل من بيتي في المقطم، وماعرفتش السبب وقتها، وقالولي هتعرفي كل حاجة لما توصلي القسم، والفيديوهات اللي في التقارير الفنية، دي كلها هزار، والخلايجة اللي ظاهرين فيها دول مصريين، وفيديو الفستان كان مجرد ديكور مش حقيقي.”
وأكملت أم سجدة في اعترافاتها : “أنا مش بكسب أي فلوس من الفيديوهات دي لا من التيك توك ولا من الفيسبوك، والمحتوى بتاعي مش بقلع فيه ولا أبين جسمي، يمكن بس صوتي بيعلى شوية.
وأوضحت البلوجر أم سجدة المتهمة بالتحريض على الفسق والفجور والإساءة للمرأة المصرية، وغسيل الأموال: “الموبايل اللي اتحجز معايا ده فعلًا بتاعي، وبستخدمه في تصوير الفيديوهات ونشرها وكمان في المكالمات، ومفيش أي علاقة ولا خلافات بيني وبين الأشخاص اللي وردت أسماؤهم في محاضر جمع الاستدلالات أو في محاضر الضبط، وأنا معرفش حاجة عن الكلام ده، ومش بقدم محتوى خادش للحياء، الفيديوهات دي كلها هزار أو إعلانات مش أكتر.
