كشفت الفنانة حورية فرغلي، حقيقة خلافها مع الفنان محمد رمضان، وعدم تبادله السلام معها في أثناء تصويره مسلسله الشهير الأسطورة، وخاصة بعد نجاحهما سويًا في فيلمي عبده موته وقلب الأسد.
وقالت حورية فرغلي في تصريحات تليفزيونية: محصلش إني روحت لمحمد رمضان الكواليس لما كان بيصور الأسطورة ومرضيش يسلم عليا، أنا كنت بصور قريب منه وقتها فيلمي طلق صناعي، وعرفت إنه في نفس المكان روحت سألت عليه قالولي بيصور قولتلهم قولوا له إني عايزة أسلم عليه، وبعدها اليوم خلص وأنا كملت شغلي عادي.
وتابعت حورية فرغلي: مقولتش إني مثلت معاه مجاملة قولت كلمني وأنا بصور حكايات بنات، واشتغل قبلها في دوران شبرا كأول مسلسل ليا لقيته بيكلمني وبيقولي يا أستاذة لقيت المنتج اللي هيعملي أول فيلم في السينما، كنت عايز أطلب من حضرتك طلب،ـ البنت اللي المفروض اللي تبقى قدامي مش لاقيين الحد المناسب، قالي حضرتك ممكن تيجي مكانها قولتله طبعا ورحتله عند أحمد السبكي وكنت أول مره أعمله ومضيت عبده موته، وقولتله ده كادوه مني ليك وبعدين عملنا قلب الأسد ومخدتش أجر.
حورية فرغلي: محمد رمضان مش نمبر وان
واستكملت حورية فرغلي حديثها، إنها لا ترى محمد رمضان “نمبر وان” كما يطلق على نفسه، قائلة: هو شايف نفسه رقم واحد ده براحته، لكن كل زملائي رقم واحد في حتتهم وشغلهم المميز، ولو عرض عليا اشتغل معاه أكيد هوافق ده نجم كبير.
