بعث محمود الخطيب، رئيس النادي الأهلي، برسالة حاسمة للاعبي الفريق الأول لكرة القدم على هامش مران اليوم على ملعب “مختار التتش”، مشددًا على أهمية الالتزام بروح الفريق والعمل الجاد لاستعادة النتائج الإيجابية.
وقال الخطيب في حديثه للاعبين “الكابتن وليد والكابتن عماد وكل الطاقم الموجود، هما اخواتكم، هما المسئولين مسئولية كاملة عن كل ما يخص الفريق الأول”.
وأضاف: “عايز اتكلم معاكم، كـ كورة، الكرة مش اسماء، الكرة جدعنة ورجولة، وسبرينتات واحتكاك، الكرة مش اسماء أبدا، خدوا بالكم، إحنا في استاد مختار التتش (رحمة الله عليه) أحد الاساطير، مرورًا بـ وجود سيادتكم وكلهم كانوا احسن منا، كله راح وانتم دلوقتي وجهة النادي”.
وتابع: “الفترة اللي فاتت، مكنتش أحب أبدا تكون موجودة معاكم أنتم، الاهلي كيان، الأهلي تاريخ، الأهلي مبادئ، الأهلي قيم، والأهلي هيبقى كدا.. والأهلي هيذكر اللي هيمشي على نفس الخط بتاعه، لازم نفكر يا رجالة في الكلام دا.. إحنا النهاردة ناويين نقدم إيه ونعمل إيه”.
وواصل: “أنا اتكلمت معاكم قبل كدا.. واضح إن إحنا نسينا، إزاي تقدروا جماهير الأهلي وتحترموا كيان النادي، هو دا المطلوب منكم، النادي الأهلي بيصبر لكن مبيقبلش أي حاجة غير اللي هيساهم في رفع اسم كيان هذا النادي، دا اللي إحنا هنقبله بس”.
وواصل حديثه: “أنا عندي ثقة كبيرة في كل واحد فيكم، ننسى الفترة اللي فاتت، نشطب عليها، ونشوف اللي جاي ايه، وانا متأكد يا رجالة، لو التركيز زاد، الموضوع ان شاء الله تحققوا كل اللي تتمنوه، واللي الجماهير تتمناه، حافظوا على تاريخكم تاريخ ناديكم، نقدر جماهيرنا ونحترمهم، وان شاء الله كلنا نمد ايدينا ونقرأ الفاتحة”.
