ظهرت شيماء سعيد، أرملة المطرب الشعبي الراحل إسماعيل الليثي، لأول مرة بعد انقضاء فترة العدة عقب وفاته، معربة عن حزنها الشديد لفقدانها وفقدان نجلهما قبل رحيله بعام، موضحة أن حياتها انتهت من بعد رحليهما.
وقالت أرملة إسماعيل الليثي، في لايف عبر حسابها بـ تيك توك: قضيت فترة العدة بـ أدب واحترام، لأنه كان أبويا وأمي والنفس اللي بتنفسه، أنا كنت عايشة علشانه ومكنتش بشوف غيره، كل اللي أذوه ودمرونا أنا مش هسامحهم وهسيب ربنا ياخدلي حقي من الناس دي كلها، ربنا موجود والناس اللي بتأذي، الأذى وحش أوي، أنتوا بتتعالوا على قضاء ربنا.
وتابعت: الشخص ده عايش وفاتح بيت ومخلف ولاد ليه كده؟، ابني وجوزي مات ومحدش رحمني، قالوا عليا أوحش كلام في الدنيا مع أنهم مشافوش مني غير كل حاجة حلوة، أنا بعامل ربنا مبعاملش حد.
وأضافت شيماء سعيد: العزيز مات والحياة والدنيا ماتت بعد رضا وأبو رضا، حكايتي أنا وإسماعيل خلصت بدري من قبل ما تبدأ، أنا مش عايزة غير دعواتكم ليه وليا، ومحدش يزعل مراته ولا تزعلي جوزك مفيش حاجة مستاهلة، على قد ما تقدري اعفي وسيبي اللي ليكي لـ رب الكون هو اللي هيجبلك حقك وأنتي قاعدة بتتفرجي.
وكان توفي الفنان إسماعيل الليثي، في نوفمبر الماضي 2025، متأثرًا بإصاباته جراء الحادث المروع الذي تعرض، ما تسبب له في نزيف بالمخ وتدهور حالته الصحية، ويأتي رحيله بعد نحو عام من فقدانه ابنه ضاضا، الذي كان حديث مواقع السوشيال ميديا وقتها، بعد سقوطه من شرفة منزله، ما أضاف حزنًا كبيرًا إلى أسرته وجمهوره.
