في ظل حالة من الجدل والحزن التي سادت مواقع التواصل الاجتماعي عقب إعلان سيدة من منطقة سموحة بالإسكندرية إنهاء حياتها، كشف منشور سابق لها على «فيس بوك» جانبًا من معاناتها الشخصية خلال السنوات الماضية.
سيدة الإسكندرية تروي معاناتها في منشور سابق:
وقالت في منشورها: «أنا شوفت قلة أصل وقسوة وافترا وأكل حقوق من قريب وغريب.. ده أنا عشت أيام وسنين وقصص محدش يعرفها غير ربنا.. أنا وقفت بعد موت أبويا!! ودي بعدها مفيش حاجة ممكن تكسر، دخلت مستشفيات ومحاكم وقعدت في قعدات عرفية بطولي وسط 70 راجل».
وأضافت: «اشتغلت وسافرت وروحت وجيت وعافرت، حرمت نفسي سنين من حتى خروجة حلوة مع صحابي عشان كنت بدفع حضانات وإيجارات ودراسة وكورسات، وعمر ما حد عرف حتى أقرب الناس.. اشتغلت بإيد وربيت بنتين بإيد تانية وحليت مشاكل بإيد وصديت أعداء بإيد».
وتابعت: «بيتي اتحرق كله قدام عيني بكل حاجة فيه، وقلت قدر الله وما شاء فعل ومشيت ورجعت أحسن من الأول بفضل الله، تعبت ودخلت مستشفيات وجالي وعكات صحية محدش يعرف عنها حاجة أبدا وقمت.. خسرت عزيز وغالي ودهب وفلوس وناس وحب ووقعت 100 مرة وقمت أقوى من كل مرة».
واختتمت كلماتها قائلة: «عموما أنا هفضل فخورة جدًا بنفسي مهما حصل، وقصتي هفضل أحكيها، وأنتوا احكوا عني لولادي».
