أدلى المتهم بانتحال صفة قاضٍ باعترافات تفصيلية أمام جهات التحقيق، كشف خلالها كيف بدأ رحلة انتحال الشخصية، مؤكدًا أن الفكرة جاءت بعد خروجه من السجن في نهاية عام 2023.
وقال المتهم، بحسب ما ورد في التحقيقات: “أنا من حوالي 3 سنين اتحبست في قضيتين نصب، وكنت منتحل فيهما صفة مستشار في مجلس الدولة، ولما خرجت الناس مكانتش بتعاملني كويس، لكن لما كنت بقول إني مستشار كانوا بيشوفوني حاجة كبيرة وبيحترموني.”
وأضاف: “بدأت أشتري بدل، وجبت وشاح من على النت، وقعدت أقرأ عن شغل القضاة وأفهم طبيعة شغلهم، وبعدها عملت حسابات على فيسبوك وإنستجرام وتيك توك، وكنت بصور نفسي وأنزل الصور.”
وتابع المتهم: “لقيت إن الصور العادية مش بتجيب مع الناس، فبدأت أروح دار القضاء العالي أتصور هناك وأنزل الصور، وبعدها تعرفت على حاجب في محكمة شمال القاهرة، وكنت بديله 100 جنيه، فيدخلني قاعة المداولة، ويصورني وأنا لابس الوشاح، وكمان يدخلني قاعة المحكمة أقعد على المنصة وأتصور.”
وأوضح أنه كرر ذلك عدة مرات، ثم نشر الصور ومقاطع الفيديو عبر حساباته على مواقع التواصل الاجتماعي، مضيفًا: “في مرة قلت لعامل الأسانسير إني قاضي في مجلس الدولة، فاحترمني وطلعني بالدور اللي أنا عايزه، وفي فيديو نزلته كان هو بيفتحلي الأسانسير.”
واختتم المتهم اعترافاته قائلًا: “لحد ما الحكومة مسكتني الجمعة اللي فاتت من عين شمس، وطلعوا على الشقة ولقوا الوشاح واللاب والكروت والأوراق، وبعدها اتحجزت واتعرضت على النيابة، وده كل اللي حصل.”
