في استجابة إنسانية سريعة، تدخلت الدكتورة مايا مرسي، وزيرة التضامن الاجتماعي، لإنهاء الإجراءات اللازمة أمام كافل 3 فتيات يتيمات ومشرفتهن المسنة، بعدما كان يسعى إلى اصطحابهن لأداء العمرة خلال الأسبوع المقبل، لكن تأخر بعض الموافقات هدد بتحول الأمنية إلى حلم مؤجل.
وتعود تفاصيل الواقعة إلى تواصل الرجل مع رامي الجبالي مؤسس صفحة أطفال مفقودة، موضحًا أنه كافل لعدد من الأيتام، وأنه قرر اصطحاب 3 فتيات يتيمات، إلى جانب المشرفة المسنة التي تولت تربيتهن داخل الدار لسنوات، لأداء العمرة، برفقة شقيقته وبناتها، رغبةً منه في إسعادهن، خاصة بعد أن فقد ابنته قبل 8 سنوات، ثم زوجته قبل عام.
وأوضح الرجل أن الإجراءات الخاصة بسفر الفتيات والمشرفة تأخرت، مع اقتراب موعد السفر، ما أثار مخاوفه من عدم الانتهاء من الأوراق والموافقات اللازمة في الوقت المحدد.
وفي منشور له عبر صفحته الشخصية، أردف رامي الجبالي: “الساعه 9 مساء النهارده تواصل معايا راجل محترم وعنده طلب، وبصراحة طلب ميترفضش، الراجل معروف عنه إنه كافل أيتام كثير في منطقه المعادي، والحقيقة هو قصته مؤثرة شوية.. الراجل الجميل ده ربنا رزقه ببنت طيبه زيه، وزوجه كريمة ومن أصل كريم.. بس للأسف بنته توفاها الله من 8 سنين وزوجته توفاها الله من سنة”.وتابع: “هذه الأسرة أسعدت قلوب أيتام كثير على مدار سنين طويلة في صمت، ومن بعد وفاة بنته، أصبحت الأيتام بناته، ومن بعد وفاة زوجته أصبحت الايتام كل حياته.. الراجل الجميل قرر ياخد 3 بنات أيتام ومعاهم المشرفة بتاعتهم الست المسنة اللي ربت البنات في الدار سنين طويلة ويطلع بيهم عمرة بصحبة أخته وبناتها ويفرحهم زي ما كان بيفرح بنته وزوجته، للأسف الإجراءات تأخرت شويه، ومعاد السفر قرب، وهو خايف ميلحقش يخلص الأوراق وموافقات وزارة التضامن الاجتماعي؛ لأن ميعاد السفر الأسبوع القادم”.
وأضاف رامي الجبالي: “فكلمني أحاول أساعده، لعل وعسى يلحق يسافر بيهم ويفرحهم.. لو ليهم نصيب، قفلت معاه التليفون، وارسلت رسالة لصديق في مكتب وزيرة التضامن أشرحله الحكاية، وتوقعت انه يشوفها الصبح، ويرد عليا اخر اليوم، عشان اتفاجئ بالدنيا بتتقلب.. الموضوع وصل للدكتورة مايا مرسي في أقل من ربع ساعة!، أخدوا تليفون الراجل وكلموه فورًا، بعد ما شكروه على موقفه الإنساني.. فهموا منه الحكاية واللي ناقص إيه ولحد من ساعة التليفونات شغالة عشان يلحقوا ميعاد سفر الايتام وأمهم البديلة اللي قضت عمرها بتربيهم ويجهزوا إيه من بكره عشان البنات تلحق تسافر.. الراجل كلمني من شويه مش مصدق فرحان وراضي وهينام مبسوط، هو والبنات من قبله؛ لأنه بلغهم إن الوزيرة قالت إن شاء الله عمرة مقبولة”.
وتوجه مؤسس أطفال مفقودة بالشكر لكل موظف بوزارة التضامن الاجتماعي ولوزيرة التضامن الاجتماعي واصفًا إياها بالوزيرة الإنسانة، قائلًا: “شكرًا لكل موظف عمل شغله بعد نص الليل، شكرا للموقف الإنساني اللي محدش كان هيعرف عنه حاجه لو أنا مكتبتش عنه، وشكرًا للراجل الجميل اللي أصبحت الأيتام كل حياته، من قبلهم شكرًا للوزيرة الإنسانة على الموقف الإنساني المحترم ده”.
