تحدثت الفنانة عبير صبري عن طلاقها لأول مرة، موضحة أنها مرت بفترة عصيبة بعد مرورها بحالة نفسية سيئة نتيجة الانفصال، مؤكدة أنها أعلنت الانفصال بعد أشهر من وقوع الطلاق بسبب عدم جاهزيتها نفسيًا، بجانب خضوعها للعلاج من نوبات هلع.
وقالت عبير صبري، في تصريحات تلفزيونية:أنا أعلنت انفصالي بعد مدة طويلة من وقوع الطلاق، لأني مكنتش جاهزة نفسيًا ولا صحيًا أني أتعامل مع الواقع، الواقع بالنسبة ليا كان بيتغير فجأة فكنت فاقدة السيطرة على نفسي وعايزة أحس أني ثابتة وأحس أني عارفة أواجه نفسي والناس وأواجه نفسي بالوضع الجديد، فخدت وقت طويل علشان أقدر أظهر.
وأضافت عبير صبري: وضعي النفسي كان صعب جدًا، حالتي النفسية كانت تعبانة جدًا ومبنامش خالص وجالي نوبات هلع وبعاني منها لغاية دلوقتي وبتعالج، ولحظة أني أشوف نفسي في المراية كانت صعبة لأن نفسي صعبت عليا ومش عارفاني، كنت ببص في المراية أقول أنتي مين؟، حتى مكنش عندي قدرة أني أطبطب على نفسي، خدت شهور علشان أقدر أحط إيدي على كتفي وأقول لنفسي متزعليش أنا كويسة
واستكملت: مكنتش بتكلم مع نفسي لأني بهرب من نفسي لأن عندي أسئلة كتير مفيش ليها إجابات، حفل مطب كبير في حياتي مكنتش مستعدة له، الفترة كلها كانت صعبة أوي، وتقريبًا كنت بحاول ألاقي نفسي تاني كنت مهزومة جدًا، ولما جالي نوبات الهلع كانت بتجيلي بصعوبة أوي وكنت بروح الطوارئ 3 مرات في الأسبوع، وكنت بكلم ربنا وأقوله أنا لوحدي ألحقني، وربنا هو أهم حاجة في حياتي وهو السند، والفقد أيًا كان شكله سواء موت أو انفصال هو مؤلم، ده أصعب تجارب يمر بيها البني آدم، ده بيأذي لو متعلقة بالحاجة اللي بتحبيها حتى لو أماكن.
وتابعت: في حاجات كتير ممكن الستات تفتقدها في العلاقة العاطفية نمرة واحد الفراغ العاطفي والغموض وقلة الوقت وقلة الاهتمام، ودي حاجات كل الستات بتشترك فيها، وفي حاجات تانية كتير زي الثقة والإخلاص واعتياد النعمة زي أن الناس بتبعتبر وجودك مضمون والمساحة الآمنة دي مش هتتغير فمش لازم نبذل مجهود.
