لما ييجي عيد الحب، ناس كتير تفتكر إن للحب يوم مخصوص في السنة، لكن الحقيقة إن الحب أكبر من تقويم، وأعمق من تاريخ، ومش محتاج مناسبة عشان يبان.
الحب ساكن جوانا، في القلوب النضيفة اللي مليانة إيمان وتوكل، قلوب بتعمل الخير من غير ما تستنى مقابل، وبتقف جنب اللي محتاجها من غير تردد ولا تأخير.
الحب مش كلمة حلوة تتقال، ولا احتفال يعدّي وخلاص، الحب بيظهر في المعاملة، في المواقف الصعبة قبل السهلة، لما نزعل وننصف، لما الدنيا تضيق ونبقى سند، ولما حد يحتاجنا ونكون موجودين بجد.
مش محتاجين عيد عشان نكون أوفياء، ولا تاريخ عشان نصل أهلنا ونحب حبايبنا وأصحابنا.
الحب الحقيقي ما بيتأجلش، ولا بيتجزأ، وما ينفعش نحب النهارده ونكره بكرة.
أنا مؤمن إن كل يوم في حياتنا هو عيد حب، لأن الحب مش بس للعشاق، الحب للأب والأم، للأخ والأخت، للصديق والصديقة، للجار، للمعلم، ولكل إنسان مرّ في حياتنا وترك أثر طيب.
الحب حياة كاملة، مش يوم واحد ولا مناسبة محدودة.
ازرعوا الحب في كلامكم،
والرحمة في أفعالكم،
وخلي أيامكم كلها حب،
مش بس يوم في السنة.
وكل سنة وانتوا طيبين،
ويارب تفضل قلوبنا عامرة بالخير والرحمة طول العمر.
